ალექსანდრე შიმკევიჩი

ალექსანდრე შიმკევიჩი (1858­-1907) - პოლონური წარმოშობის არქიტექტორი, კავკასიის მეაბრეშუმეობის სადგურის შენობათა კომპლექსისა და საგამოფენო ავეჯის ავტორი. დაიბადა პეტერბურგში პოლონური ფესვების მქონე პოლიკარპე შიმკევიჩისა და შვედურ-გერმანული წარმოშობის ემილია-ანა-მარია პეტროვნას ოჯახში. თავის ორ ძმასთან ერთად ალექსანდრე სწავლობდა კარლ მაის სკოლაში, ხოლო შემდეგ პეტერბურგის სამხატვრო აკადემიაში, სადაც ფერწერაში მიღწეული წარმატებებისთვის ორი მედალიც დაიმსახურა. 

აკადემიის დასრულების შემდეგ შიმკევიჩი დაინიშნა თბილისის საქალაქო არქიტექტორად (1885-1891). 1897-1901 წლებში იყო თბილისის საქალაქო დუმის არჩეული დეპუტატი. 1905-06 წლებში მუშაობდა თბილისის სამხატვრო სასწავლებლის პედაგოგად.

შიმკევიჩის პროექტით აშენდა თბილისის არაერთი გამორჩეული შენობა: კავკასიის მეაბრეშუმეობის სადგური (1891 წ.), საქართველოს უზენაესი სასამართლო (1894 წ.), შოთა რუსთაველის სახელობის სახელმწიფო აკადემიური თეატრი (არქიტექტორ კ. ტატიშჩევთან ერთად; 1901 წ.), კონსერვატორია (1904 წ.), ფუნიკულიორის ქვედა სადგური (არქიტექტორ ბლუშემთან ერთად; 1905 წ.), თამამშევის საცხოვრებელი სახლი (1900-1905 წწ.) და სხვ. ასევე მისი აშენებულია ბათუმის გიმნაზია (1897 წ.).